مراجعة لهاتف #آيفون 11 برو بعد 4 أشهر من الاستعمال آيفون11 الإيجابيات: -المعالج:  اول حاجة باينة لي هي المعالج، التيليفون ديما خفيف ما يتقا...

 مراجعة لهاتف #آيفون 11 برو بعد 4 أشهر من الاستعمال

آيفون11

الإيجابيات:

-المعالج:

 اول حاجة باينة لي هي المعالج، التيليفون ديما خفيف ما يتقال ما يبلوكي وجامي غلقت التطبيقات عكس هاتف هواوي لي كان عندي لي كان للزم عليا نغلق التطبيقات المفتوحة.

- الكاميرا:

 خرافية صراحة خاصة الفيديو ، الفيديو نصورو واقف ونمشي يخرج سمووث بدون اهتزاز شغل صورتو بستابيليزاتور.

- البطارية:

 والتي تخليك تعدي النهار كامل ، عكس ايفون 11 كانت ماتكمليش النهار.

السلبيات:

- النوتش:

الحاجة الاولى هي يعني ماشي سلبية ولكن انا ماعجبتنيش ولي هي النوتش لكبير، هوما يقولو فيه مستشعر face id على بيها مانحاوهش ولكن كن يصغرو فيه أحسن.

-الوزن:

 الهاتف ثقيل وهذا نلقاوه في جميع هواتف أبل، ماعلاباليش علاه التيليفونات تاعهم ثقال وهذا الشيء يخلي يدك تتعب خاصة صبعك الصغير لي يحمل الهاتف.

- سعة التخزين:

سعة التخزين ولي مازال في 2020 يديرولنا 64go وهذي تبانلي حاجة بيزار خاصة كي تكون من هواة التصوير وتصور 4K يعني الميموار تتعمرلك ليه ليه.

-لوحة المفاتيح:

 مافهمتش غير انا صاريلي هذا المشكل ولا مام نتوما، الكلافي تع ايفون ماساعدنيش وندير بزاف الاخطاء كي نكون نكتب عكس هاتف هواوي لي عندي، كي شغل الحروف قراب لبعضاهم بزاف ولا ماعلاباليش وش.

هذو بعض النقاط باختصار وتبقى هذي المراجعة مجرد رأي.